വിശദീകരിച്ചിട്ടും വിമർശനം ശമിച്ചില്ല; പേളി മാണിയുടെ വീഡിയോയ്ക്ക് താഴെ രൂക്ഷ പ്രതികരണങ്ങൾ, 'പരാജയപ്പെട്ട സംവിധായകൻ' പരാമർശത്തിലും മാപ്പ്

കൊച്ചി: ഡൽഹിയിൽ വിദ്യാർഥി പ്രക്ഷോഭത്തെക്കുറിച്ച് പങ്കുവെച്ച സോഷ്യൽ മീഡിയ പോസ്റ്റിനെ ചൊല്ലി വിവാദത്തിലായ നടിയും അവതാരകയുമായ പേളി മാണി ദിവസങ്ങൾക്കുശേഷം വിശദീകരണ വീഡിയോയുമായി രംഗത്തെത്തിയെങ്കിലും, അതിന് പിന്നാലെയും വിമർശനങ്ങൾ ശക്തമായി തുടരുന്നു. പേളിയുടെ വിശദീകരണം സത്യസന്ധവും വിശ്വസനീയവുമല്ലെന്നാണ് സമൂഹമാധ്യമങ്ങളിൽ ഉയരുന്ന പ്രധാന ആരോപണം.

വിദ്യാർഥി സമരത്തെക്കുറിച്ചുള്ള ആദ്യ പോസ്റ്റിൽ, "ജീവൻ അപകടത്തിലാണെങ്കിൽ സമരം അവസാനിപ്പിച്ച് വീട്ടിലേക്ക് മടങ്ങുക" എന്നായിരുന്നു പേളിയുടെ ആഹ്വാനം. എന്നാൽ, എല്ലാവരും സമരം അവസാനിപ്പിക്കണമെന്നല്ല തന്റെ ഉദ്ദേശ്യമെന്നും, വിദ്യാർഥികളുടെ സുരക്ഷയെ മാത്രം മുൻനിർത്തിയാണ് അത്തരമൊരു അഭിപ്രായം രേഖപ്പെടുത്തിയതെന്നും വിശദീകരണ വീഡിയോയിൽ അവർ പറഞ്ഞു.

പോസ്റ്റ് പ്രസിദ്ധീകരിച്ച ശേഷം താൻ ഒരിക്കലും പ്രതീക്ഷിക്കാത്ത തരത്തിലുള്ള വ്യാഖ്യാനങ്ങളാണ് സമൂഹമാധ്യമങ്ങളിൽ ഉയർന്നതെന്നും, തന്റെ വാക്കുകൾ നെഗറ്റീവ് രീതിയിൽ അവതരിപ്പിക്കപ്പെട്ടത് വേദനിപ്പിച്ചതായും പേളി വ്യക്തമാക്കി.

അതേസമയം, വിമർശനങ്ങൾക്ക് മറുപടിയായി പങ്കുവെച്ച ഇൻസ്റ്റഗ്രാം സ്റ്റോറിയിൽ ഒരു "പരാജയപ്പെട്ട സംവിധായകൻ" എന്ന പരാമർശം നടത്തിയതിൽ ഖേദം പ്രകടിപ്പിച്ചും പേളി മാപ്പ് പറഞ്ഞു. അത്തരമൊരു പ്രയോഗം തന്റെ ഭാഗത്തുനിന്നുണ്ടായ വലിയ തെറ്റാണെന്നും, ആരെയും അങ്ങനെ വിശേഷിപ്പിക്കാൻ തനിക്ക് അവകാശമില്ലെന്നും അവർ പറഞ്ഞു.

താൻ സംവിധായകൻ സിബി മലയിൽയുടെ ആരാധികയാണെന്നും, അദ്ദേഹത്തെ ഉദ്ദേശിച്ചല്ല ആ പരാമർശമെന്നും പേളി വിശദീകരിച്ചു. തന്റെ പോസ്റ്റിനെ വിമർശിച്ച മറ്റൊരാൾക്കുള്ള മറുപടിയായാണ് സ്റ്റോറി പങ്കുവെച്ചതെന്നും, അതിലേക്ക് സിബി മലയിലിന്റെ പേര് എങ്ങനെ വന്നുവെന്ന് ഇപ്പോഴും മനസ്സിലാകുന്നില്ലെന്നും അവർ കൂട്ടിച്ചേർത്തു. തന്റെ വാക്കുകൾ ആരെയെങ്കിലും വേദനിപ്പിച്ചിട്ടുണ്ടെങ്കിൽ ഹൃദയപൂർവം ക്ഷമ ചോദിക്കുന്നതായും പേളി പറഞ്ഞു.

എന്നാൽ, ഈ വിശദീകരണവും സോഷ്യൽ മീഡിയ ഉപയോക്താക്കളെ തൃപ്തിപ്പെടുത്തിയില്ല. യൂട്യൂബിൽ പങ്കുവെച്ച വീഡിയോയുടെ താഴെ "പരീക്ഷയ്ക്ക് പഠിച്ചുപറയുന്നതുപോലെയാണ്", "ഈ വിശദീകരണത്തിനും മറ്റൊരു വിശദീകരണം വേണം", "എന്ത് ചെയ്തിട്ടും മെനയാകുന്നില്ല" തുടങ്ങിയ കമന്റുകളാണ് കൂടുതലും പ്രത്യക്ഷപ്പെട്ടത്. ചിലർ ഫോളോവേഴ്‌സ് കുറയുന്നതാണ് വിശദീകരണത്തിന് കാരണമെന്നും പരിഹസിച്ചു.

"കാവി ഡ്രസ് ഇടാമായിരുന്നു", "ഇപ്പോൾ കമന്റ് ഓഫ് ചെയ്യും", "മലയാളികളെ മണ്ടന്മാരാക്കല്ലേ", "ഗാലറി നമുക്ക് എതിരാണല്ലോ" തുടങ്ങിയ ട്രോൾ കമന്റുകളും വ്യാപകമായി പ്രചരിക്കുന്നുണ്ട്. വിശദീകരണ വീഡിയോയിലെ ചില കമന്റുകൾ നീക്കം ചെയ്യുന്നതായും സമൂഹമാധ്യമ ഉപയോക്താക്കൾ ആരോപിക്കുന്നു.

വിവാദത്തിന് പിന്നാലെ പേളി മാണിയുടെ ഇൻസ്റ്റഗ്രാം അക്കൗണ്ടിൽ ഫോളോവേഴ്‌സിന്റെ എണ്ണത്തിൽ വലിയ ഇടിവുണ്ടായതായും വിവിധ സോഷ്യൽ മീഡിയ ട്രാക്കിംഗ് കണക്കുകൾ ചൂണ്ടിക്കാട്ടുന്നു. ഇൻസ്റ്റഗ്രാമിന് പുറമെ യൂട്യൂബ്, ഫെയ്‌സ്ബുക്ക് പ്ലാറ്റ്‌ഫോമുകളിലും പിന്തുടരുന്നവരുടെ എണ്ണത്തിൽ കുറവുണ്ടായതായി റിപ്പോർട്ടുകൾ പറയുന്നു.

വിമർശനം ശക്തമായ സാഹചര്യത്തിൽ, സമൂഹമാധ്യമങ്ങളിലെ വിവാദം ഇപ്പോഴും തുടരുകയാണ്. പേളിയുടെ വിശദീകരണം വിവാദങ്ങൾക്ക് വിരാമമിടുമോ, അതോ ചർച്ചകൾ കൂടുതൽ ശക്തമാകുമോ എന്നത് കണ്ടറിയേണ്ടതുണ്ട്.