പാഴ്‌സൽ ഡ്രോപ്പ് മോഡൽ പൊളിഞ്ഞു; ചളിക്കവട്ടത്ത് ഒരു കിലോയ്ക്ക് മേൽ കഞ്ചാവുമായി യുവാവ് എക്സൈസിന്റെ പിടിയിൽ

കൊച്ചി: ലഹരിമാഫിയയുടെ പുതിയ "പാഴ്‌സൽ ഡ്രോപ്പ്" തന്ത്രം എക്സൈസ് തകർത്തു. ആളൊഴിഞ്ഞ സ്ഥലത്ത് കഞ്ചാവ് അടങ്ങിയ പാഴ്‌സൽ ഉപേക്ഷിക്കാൻ എത്തിയ പശ്ചിമ ബംഗാൾ സ്വദേശി ഷാരൂഖ് ഖാൻ (26) ആണ് എറണാകുളം എക്സൈസ് സ്പെഷ്യൽ സ്ക്വാഡ് പിടിയിലായത്.

ചളിക്കവട്ടത്ത് നടത്തിയ പരിശോധനയിൽ പ്രതിയുടെ കൈവശം നിന്ന് 1.058 കിലോഗ്രാം കഞ്ചാവ് പിടിച്ചെടുത്തു. എക്സൈസ് സ്പെഷ്യൽ സ്ക്വാഡ് സർക്കിൾ ഇൻസ്പെക്ടർ രഞ്ജിത് കുമാറിന്റെ നേതൃത്വത്തിലുള്ള സംഘമാണ് പ്രതിയെ അറസ്റ്റ് ചെയ്തത്.

എക്സൈസും മറ്റ് എൻഫോഴ്‌സ്‌മെന്റ് ഏജൻസികളും ലഹരിവേട്ട ശക്തമാക്കിയതോടെ, ലഹരിമാഫിയ ഇടപാടുകൾക്കായി പുതിയ രീതികളിലേക്ക് മാറിയിരിക്കുകയാണ്. ഉപഭോക്താക്കളിൽ നിന്ന് മുൻകൂട്ടി പണം അക്കൗണ്ടിലേക്ക് സ്വീകരിച്ച ശേഷം, ലഹരിവസ്തുക്കൾ അടങ്ങിയ പാഴ്‌സൽ ആളൊഴിഞ്ഞ സ്ഥലങ്ങളിൽ ഉപേക്ഷിക്കുകയും, പിന്നീട് അതിന്റെ ഫോട്ടോയും വീഡിയോയും ഉപഭോക്താക്കൾക്ക് അയച്ചുനൽകുകയും ചെയ്യുന്നതാണ് പുതിയ രീതി. തുടർന്ന് ഉപഭോക്താക്കൾ സ്ഥലത്തെത്തി പാഴ്‌സൽ കൈപ്പറ്റുന്നതുമാണ് പതിവ്.

ജൂലൈ 14-ന് ചളിക്കവട്ടം പ്രദേശത്ത് ഇത്തരമൊരു ഇടപാട് നടക്കുമെന്ന രഹസ്യവിവരം ലഭിച്ചതിനെ തുടർന്ന് എറണാകുളം എക്സൈസ് സ്പെഷ്യൽ സ്ക്വാഡ് മേഖലയിൽ നിരീക്ഷണം ശക്തമാക്കി. സംശയാസ്പദമായി എത്തിയ ഷാരൂഖ് ഖാനെ പിന്തുടർന്ന് പിടികൂടിയപ്പോഴാണ് കഞ്ചാവ് പിടിച്ചെടുത്തത്.

ലഹരിമാഫിയയുടെ പുതിയ പ്രവർത്തനരീതികൾ കണ്ടെത്തി ശക്തമായ നടപടി തുടരുമെന്ന് എക്സൈസ് അധികൃതർ അറിയിച്ചു. സംഭവത്തിൽ കൂടുതൽ അന്വേഷണം പുരോഗമിക്കുകയാണ്.