ന്യൂഡൽഹി: രാജ്യത്ത് നടക്കുന്ന വിവിധ പ്രതിഷേധങ്ങളും പ്രക്ഷോഭങ്ങളും റിപ്പോർട്ട് ചെയ്യുന്ന മാധ്യമപ്രവർത്തകരുടെ തൊഴിൽപരമായ സുരക്ഷ ഉറപ്പാക്കുന്നതിനും വാർത്തകളുടെ നിഷ്പക്ഷത നിലനിർത്തുന്നതിനുമായി പ്രസ് കൗൺസിൽ ഓഫ് ഇന്ത്യ (പി.സി.ഐ) പുതിയ മാർഗനിർദേശങ്ങൾ പുറപ്പെടുവിച്ചു. പ്രക്ഷോഭങ്ങൾ റിപ്പോർട്ട് ചെയ്യുന്നതിനിടയിൽ മാധ്യമപ്രവർത്തകർ നേരിടുന്ന സുരക്ഷാ വെല്ലുവിളികൾ പരിഹരിക്കുന്നതിനും മാധ്യമസ്ഥാപനങ്ങളും ക്രമസമാധാനപാലകരും തമ്മിലുള്ള ഏകോപനം മെച്ചപ്പെടുത്തുന്നതിനുമാണ് കൗൺസിൽ ഈ നിർദേശങ്ങൾ മുന്നോട്ടുവെച്ചിരിക്കുന്നത്.
പ്രധാന മാർഗനിർദേശങ്ങൾ:
- തിരിച്ചറിയൽ രേഖകൾ: മാധ്യമപ്രവർത്തകർ തങ്ങളുടെ സ്ഥാപനങ്ങൾ നൽകുന്ന സാധുവായ തിരിച്ചറിയൽ കാർഡോ പി.ഐ.ബി, ഡി.ഐ.പി അക്രഡിറ്റേഷൻ കാർഡുകളോ നിർബന്ധമായും കൈവശം വെക്കണം. തിക്കിലും തിരക്കിലും അപകടങ്ങൾ ഒഴിവാകുന്ന രീതിയിൽ, തിരിച്ചറിയൽ കാർഡുകൾ വ്യക്തമായി കാണത്തക്കവിധം സുരക്ഷിതമായി ധരിക്കേണ്ടതാണ്.
- സുരക്ഷാ മുൻകരുതലുകൾ: സംഘർഷസാധ്യതയുള്ള മേഖലകളിൽ പോകുന്നവർ പ്രഥമശുശ്രൂഷാ സാമഗ്രികൾ, കുടിവെള്ളം, സംരക്ഷണ കണ്ണടകൾ (Eye Protection Glasses) എന്നിവയടങ്ങിയ എമർജൻസി കിറ്റുകൾ കരുതണം. കണ്ണീർവാതക ഷെല്ലുകൾ ഉൾപ്പെടെയുള്ള സ്ഫോടക വസ്തുക്കളിൽ സ്പർശിക്കരുത്. പൊലീസ് ബാരിക്കേഡുകളിലോ വാഹനങ്ങളിലോ ക്യാമറകൾ സ്ഥാപിക്കരുതെന്നും നിർദേശമുണ്ട്.
- മാധ്യമധർമവും നിഷ്പക്ഷതയും: റിപ്പോർട്ടിങ്ങിനിടെ ഒരു പക്ഷത്തോടും ആഭിമുഖ്യം പുലർത്തുകയോ പ്രകോപനങ്ങൾ സൃഷ്ടിക്കുകയോ ചെയ്യരുത്. പൊലീസിന്റെയോ പ്രതിഷേധക്കാരുടെയോ പ്രവർത്തനങ്ങൾക്ക് തടസ്സമുണ്ടാക്കുന്ന വിധത്തിൽ ഇടപെടലുകൾ നടത്തരുത്.
- പൊലീസുമായുള്ള സഹകരണം: നിയമാനുസൃതമായ പൊലീസ് നിർദേശങ്ങൾ പാലിക്കുകയും അനാവശ്യ തർക്കങ്ങൾ ഒഴിവാക്കുകയും വേണം. തങ്ങൾ മാധ്യമപ്രവർത്തകരാണെന്ന വിവരം ശാന്തമായി ഉദ്യോഗസ്ഥരെ ബോധ്യപ്പെടുത്തണം. സംഘർഷാവസ്ഥ രൂക്ഷമാകുന്ന ഘട്ടങ്ങളിൽ സുരക്ഷിതമായ അകലം പാലിക്കാൻ ശ്രദ്ധിക്കണം.
- വസ്തുതാ പരിശോധന: വാർത്തകൾ പ്രസിദ്ധീകരിക്കുന്നതിന് മുൻപ് ഒന്നിലധികം വിശ്വസനീയമായ സ്രോതസ്സുകളിലൂടെ വിവരങ്ങൾ സ്ഥിരീകരിക്കണം. എല്ലാ കക്ഷികളുടെയും പ്രസ്താവനകൾ തുല്യപ്രാധാന്യത്തോടെയും സൂക്ഷ്മമായും പരിശോധിക്കേണ്ടതാണ്.
- തത്സമയ സംപ്രേഷണത്തിലെ നിയന്ത്രണം: സുരക്ഷാസേനയുടെ തന്ത്രപരമായ നീക്കങ്ങൾ, തത്സമയ വിന്യാസം, രക്ഷാപ്രവർത്തന വഴികൾ എന്നിവ ക്രമസമാധാനപാലനത്തിന് തടസ്സമാകുന്ന രീതിയിൽ തത്സമയം സംപ്രേഷണം ചെയ്യരുത്.
മാധ്യമ മത്സരങ്ങളുടെയോ എക്സ്ക്ലൂസീവ് വാർത്തകളുടെയോ പേരിൽ മാധ്യമപ്രവർത്തകരുടെ ജീവനും സുരക്ഷയും പണയപ്പെടുത്തരുതെന്നും പ്രസ് കൗൺസിൽ ഓഫ് ഇന്ത്യ കർശന നിർദേശം നൽകി.
