by 
സ്‌നേഹം പങ്കിടാം, മാനവികത പുലരട്ടെ; ഇന്ന് ലോക സമാധാന ദിനം
എല്ലാ വര്‍ഷവും സെപ്റ്റംബര്‍ 21 ലോക സമാധാന ദിനമായി ആചരിക്കുന്നു. ആഗോളമായി വെടിനിര്‍ത്തലിന്റെയും അക്രമ രാഹിത്യത്തിന്റെയും ദിനമാണിത്. എല്ലാ രാജ്യങ്ങള്‍ക്കും ജനങ്ങള്‍ക്കും ഇടയില്‍ സമാധാനത്തിന്റെ ആശയങ്ങള്‍ ശക്തിപ്പെടുത്തുകയെന്ന ലക്ഷ്യത്തോടെയാണ് ആഗോളതലത്തില്‍ ഈ ദിനം ആചരിക്കുന്നത്. യുക്രൈന്‍-റഷ്യ സംഘര്‍ഷങ്ങളുടെയും വര്‍ധിച്ചുവരുന്ന തീവ്രവാദ ഭീഷണികളുടെയും പശ്ചാത്തലത്തിലാണ് ഇത്തവണത്തെ ലോക സമാധാന ദിനം.
സംഘര്‍ഷങ്ങള്‍ക്ക് സമാധാനപരമായ പരിഹാരം കാണാനും ശത്രുതയ്ക്ക് അറുതിവരുത്താനും ഈ ദിനം ഉപയോഗിക്കണമെന്നാണ് ഐക്യരാഷ്ട്ര സഭ ആഹ്വാനം ചെയ്യുന്നത്. സമാധാനമാണ് ഐക്യരാഷ്ട്ര സഭയുടെ ഏറ്റവും വലിയ മുദ്രാവാക്യമെന്നും സമാധാനമാണ് നമ്മുടെ ദൗത്യമെന്നും ഐക്യരാഷ്ട്രസഭ ചൂണ്ടിക്കാട്ടുന്നു. ലോകരാജ്യങ്ങളിലെമ്പാടും സമാധാനം പുലരാനും യുദ്ധങ്ങളും അക്രമങ്ങളും ഒഴിവാക്കാനും ഈ ദിനത്തില്‍ യുഎന്‍ ആഹ്വാനം ചെയ്യുന്നു.
ഈ വര്‍ഷത്തെ പ്രമേയം...
“Actions for Peace: Our Ambition for the #Global Goals” എന്നതാണ് ഇത്തവണത്തെ പ്രമേയം. 'വംശീയത അവസാനിപ്പിക്കുക, സമാധാനം കെട്ടിപ്പടുക്കുക', എന്നതായിരുന്നു കഴിഞ്ഞ വര്‍ഷത്തെ ലോക സമാധാന ദിനാചരണത്തിന്റെ പ്രമേയം.
യുഎന്നില്‍ നടന്നത്...
യുഎന്‍ പൊതുസഭ 1981ലാണ് അന്താരാഷ്ട്ര സമാധാന ദിനം പ്രഖ്യാപിച്ചത്. ലോകത്തെ 193 അംഗ രാജ്യങ്ങളും സമാധാനത്തിന് വേണ്ടി ഒരു ദിനം ആചരിക്കണമെന്ന പ്രമേയം 36/37 വോട്ടിന് പൊതുസഭ അംഗീകരിച്ചു. പിന്നീട് 2001 ല്‍ സെപ്തംബര്‍ 21-ാം തീയതി സമാധാന ദിനം ആചരിക്കുവാന്‍ തീരുമാനിച്ചു.
ലോക രാജ്യങ്ങള്‍ തമ്മില്‍ രണ്ടാം ലോക മഹായുദ്ധത്തിന് ശേഷം ചെറുതും വലുതുമായ യുദ്ധങ്ങളുണ്ടായി. യുദ്ധങ്ങള്‍ക്ക് വേണ്ടി ആണവായുധങ്ങള്‍ നിര്‍മ്മിക്കാന്‍ രാജ്യങ്ങള്‍ തമ്മില്‍ മത്സരിച്ചു. തല്‍ഫലമായി കൊച്ചുകുട്ടികള്‍ മുതല്‍ മുതിര്‍ന്നവര്‍ വരെ യാതൊരുവിധ കാരണവും കൂടാതെ മരണത്തിന് ഇരയായി. ഇതോടെയാണ് ലോകസമാധാനം എന്ന ആശയം ജനങ്ങളുടെ ഇടയില്‍ എത്തിക്കാന്‍ ഐക്യരാഷ്ട്ര സഭ ഇങ്ങനെ ഒരു ദിനം ആചരിക്കാന്‍ തീരുമാനിച്ചത്.
സമാധാനത്തിന്റെ മണി മുഴങ്ങും..
എല്ലാ വര്‍ഷവും സെപ്റ്റംബര്‍ 21ന് യുഎന്‍ ആസ്ഥാനത്ത് സമാധാനത്തിന്റെ മണി മുഴങ്ങാറുണ്ട്. വിവിധ ഭൂഖണ്ഡങ്ങളില്‍ നിന്നുള്ള കുട്ടികള്‍ സംഭാവന ചെയ്ത നാണയങ്ങള്‍ ഉപയോഗിച്ചാണ് ഈ മണി നിര്‍മ്മിച്ചിരിക്കുന്നത്. ആഫ്രിക്ക ഒഴിച്ചുള്ള മറ്റ് ഭൂഖണ്ഡങ്ങളിലെ കുട്ടികളാണ് ഈ നാണയങ്ങള്‍ സംഭാവന ചെയ്തത്. 'Long live absolute world piece' എന്ന് ഈ മണിയില്‍ ആലേഖനം ചെയ്തിട്ടുണ്ട്.
യുദ്ധ രഹിത ലോകത്തിന് വേണ്ടി നമ്മള്‍ ഓരോരുത്തരും പ്രവര്‍ത്തിക്കുകയും ലോക സമാധാനത്തിന്റെ ആവശ്യകത കുട്ടികളില്‍ എത്തിക്കുകയും വേണം. നാളത്തെ തലമുറ യുദ്ധങ്ങള്‍ ഒഴിവാക്കി നന്മ നിറഞ്ഞ മനസുമായി ജീവിക്കുവാനുള്ള സാഹചര്യം സൃഷ്ടിക്കുക എന്നതാണ് നമ്മള്‍ ഓരോരുത്തരുടേയും കടമ.
0 #type=(blogger):
ഈ സൈറ്റിൽ വരുന്ന കമ്മന്റുകൾക്കു കേരളാ ഹോട്ടൽ ന്യൂസിന് ഉത്തരവാദിത്ത്വം ഉണ്ടായിരിക്കുന്നതല്ല. ഇത് വായനക്കാർ രേഖപ്പെടുത്തുന്ന അവരുടേതായ അഭിപ്രായങ്ങൾ മാത്രമാണ്.