വാണിജ്യ സിലിണ്ടർ വിലയിൽ വൻ കുറവ് വരുന്നു; 500 മുതൽ 700 രൂപ വരെ കുറഞ്ഞേക്കും

ന്യൂഡൽഹി: രാജ്യത്ത് വാണിജ്യ എൽ.പി.ജി സിലിണ്ടറുകളുടെ വിലയിൽ ഗണ്യമായ കുറവ് വരുത്താൻ കേന്ദ്ര സർക്കാർ നീക്കം തുടങ്ങി. കേന്ദ്ര പെട്രോളിയം മന്ത്രാലയം പൊതുമേഖല എണ്ണക്കമ്പനികളുമായി നടത്തിയ ചർച്ചകൾക്ക് പിന്നാലെ, പുതുക്കിയ വില ഉടൻ പ്രഖ്യാപിക്കുമെന്ന് സർക്കാർ അറിയിച്ചു. അടുത്ത മാസം ഒന്നാം തീയതി മുതൽ പുതിയ നിരക്ക് നിലവിൽ വരുമെന്നാണ് സൂചന.

ലഭിക്കുന്ന വിവരങ്ങൾ പ്രകാരം, ഒരു വാണിജ്യ എൽ.പി.ജി സിലിണ്ടറിന് 500 മുതൽ 700 രൂപ വരെ വില കുറയാൻ സാധ്യതയുണ്ട്. ഇതോടൊപ്പം, ഗാർഹിക എൽ.പി.ജി സിലിണ്ടറുകളുടെ വിലയിലും മാറ്റമുണ്ടാകുമെന്ന സൂചനകൾ പുറത്തുവരുന്നുണ്ട്. ഇതുസംബന്ധിച്ച അന്തിമ തീരുമാനം ഉടൻ പ്രഖ്യാപിക്കുമെന്നാണ് കേന്ദ്രസർക്കാർ അറിയിച്ചത്.

പശ്ചിമേഷ്യയിലെ സംഘർഷങ്ങളെ തുടർന്ന് ഹോർമുസ് കടലിടുക്കിലൂടെ ഇന്ധന വിതരണത്തിൽ നേരിട്ട അനിശ്ചിതത്വമാണ് കഴിഞ്ഞ മാസങ്ങളിൽ എൽ.പി.ജി വിതരണത്തെയും വിലയെയും പ്രതികൂലമായി ബാധിച്ചത്. ഇതേ തുടർന്ന് വാണിജ്യ സിലിണ്ടറുകളുടെ വിതരണത്തിൽ കേന്ദ്രസർക്കാർ നിയന്ത്രണങ്ങൾ ഏർപ്പെടുത്തുകയും വില ഉയരുകയും ചെയ്തിരുന്നു.

എന്നാൽ നിലവിൽ ഹോർമുസ് മേഖലയിലെ സാഹചര്യം മെച്ചപ്പെട്ടതും വിവിധ രാജ്യങ്ങളിൽ നിന്ന് എൽ.പി.ജി കപ്പലുകളിലും കണ്ടെയ്നറുകളിലുമായി ഇന്ത്യയിലെ വിവിധ തുറമുഖങ്ങളിൽ എത്തിത്തുടങ്ങിയതും രാജ്യത്തെ എൽ.പി.ജി ലഭ്യത ഗണ്യമായി വർധിപ്പിച്ചിട്ടുണ്ട്. ആവശ്യത്തിന് ശേഖരം ഉറപ്പായ സാഹചര്യത്തിലാണ് വിതരണം പഴയ നിലയിലേക്ക് പുനഃസ്ഥാപിക്കാൻ കേന്ദ്ര സർക്കാർ അടിയന്തര നിർദേശം നൽകിയത്.

വിതരണ നിയന്ത്രണങ്ങൾ പിൻവലിക്കുന്നതുമായി ബന്ധപ്പെട്ട് സംസ്ഥാന സർക്കാരുകൾക്ക് കേന്ദ്രം കത്തയച്ചതായും റിപ്പോർട്ടുകളുണ്ട്. പുതിയ നിരക്ക് പ്രാബല്യത്തിൽ വന്നാൽ ഹോട്ടലുകൾ, റെസ്റ്റോറന്റുകൾ, കാറ്ററിങ് സ്ഥാപനങ്ങൾ, ബേക്കറികൾ, ചെറുകിട വ്യാപാര സ്ഥാപനങ്ങൾ തുടങ്ങി വാണിജ്യ എൽ.പി.ജി ഉപയോഗിക്കുന്ന മേഖലയ്ക്ക് വലിയ സാമ്പത്തിക ആശ്വാസമാകും.

വിലക്കുറവോടെ രാജ്യത്തെ വാണിജ്യ എൽ.പി.ജി വിതരണം വീണ്ടും സാധാരണ നിലയിലാകുമെന്നും, വിപണിയിലെ സമ്മർദം കുറയുന്നതോടെ ചെറുകിട വ്യാപാര മേഖലയ്ക്കും ഉപഭോക്താക്കൾക്കും ഗുണകരമായ സാഹചര്യം രൂപപ്പെടുമെന്നുമാണ് വിലയിരുത്തൽ. അടുത്ത മാസം ഒന്നാം തീയതി പ്രഖ്യാപിക്കുന്ന പുതിയ വിലയാണ് രാജ്യത്തെ എൽ.പി.ജി വിപണിയുടെ തുടർഗതിയെ നിർണയിക്കുക.