ഹൈബ്രിഡ് കഞ്ചാവ് മാഫിയക്ക് വൻ പ്രഹരം

കൊച്ചി: പെരുമ്പാവൂരിൽ പിടികൂടിയ ഹൈബ്രിഡ് കഞ്ചാവ് കേസിന്റെ അന്വേഷണത്തിൽ രാജ്യാന്തര ലഹരിമരുന്ന് ശൃംഖലയിലെ മുഖ്യപ്രതികളെന്ന് കരുതുന്ന അഞ്ച് പേർ കൂടി പൊലീസിന്റെ പിടിയിലായി. തായ്‌ലൻഡിൽ നിന്ന് കേരളത്തിലേക്ക് ഹൈബ്രിഡ് കഞ്ചാവ് കടത്തിയിരുന്ന അന്തർദേശീയ സംഘത്തിലെ പ്രധാന കണ്ണികളാണ് അറസ്റ്റിലായവരെന്നാണ് അന്വേഷണ സംഘം വ്യക്തമാക്കുന്നത്.

പാലക്കാട് മുണ്ടൂർ പുതനൂർ സ്വദേശിയായ അബു താഹിർ (39), ഒറ്റപ്പാലം സ്വദേശികളായ ഹരികൃഷ്ണൻ (25), ശ്രീജേഷ് (41), സഞ്ജയ് പി. (22), കടമ്പഴിപ്പുറം സ്വദേശി പ്രെസ്ജിത്ത് (40) എന്നിവരെയാണ് സംസ്ഥാനത്തിന്റെ വിവിധ ഭാഗങ്ങളിൽ നിന്നായി ജില്ലാ പൊലീസ് മേധാവി കെ.എസ്. സുദർശന്റെ നേതൃത്വത്തിലുള്ള പ്രത്യേക അന്വേഷണ സംഘം അറസ്റ്റ് ചെയ്തത്. കേസിലെ മുഖ്യപ്രതിയായ അബു താഹിറിനെ ബംഗളൂരുവിൽ നിന്നാണ് പിടികൂടിയത്.

ഇന്ത്യക്കകത്തും വിദേശത്തുമായി വ്യാപിച്ചുകിടക്കുന്ന ലഹരിമരുന്ന് വിതരണ ശൃംഖലയെ കേന്ദ്രീകരിച്ച് നടത്തിയ വിശദമായ അന്വേഷണത്തിനൊടുവിലാണ് പ്രതികൾ വലയിലായത്. തായ്‌ലൻഡിലെ വിവിധ വിമാനത്താവളങ്ങൾ വഴി കേരളത്തിലേക്ക് ഹൈബ്രിഡ് കഞ്ചാവ് എത്തിച്ചിരുന്ന ശൃംഖലയുടെ പ്രധാന ആസൂത്രകരാണ് ഇവരെന്ന് പൊലീസ് പറഞ്ഞു.

അന്വേഷണത്തിനിടെ പ്രതികളിൽ നിന്ന് മൊബൈൽ ഫോണുകൾ, ബാങ്ക് ഇടപാടുകളുടെ രേഖകൾ, വിദേശയാത്രാ രേഖകൾ, ഡിജിറ്റൽ തെളിവുകൾ എന്നിവ പൊലീസ് പിടിച്ചെടുത്തു. ഇവയുടെ ശാസ്ത്രീയ പരിശോധനയിലൂടെ കൂടുതൽ പ്രതികളിലേക്കും രാജ്യാന്തര ബന്ധങ്ങളിലേക്കും അന്വേഷണം വ്യാപിപ്പിക്കുമെന്ന് അധികൃതർ അറിയിച്ചു.

അബു താഹിറും ഹരികൃഷ്ണനും ചേർന്നാണ് ഏജന്റുമാരെ തായ്‌ലൻഡിലേക്ക് അയച്ചിരുന്നതെന്ന് അന്വേഷണത്തിൽ കണ്ടെത്തി. വീസയും വിമാനടിക്കറ്റും യാത്രാച്ചെലവും പ്രതിഫലവും നൽകി ആളുകളെ വിദേശത്തേക്ക് അയക്കുകയും, മടങ്ങിയെത്തുമ്പോൾ അവരുടെ കൈവശം ഹൈബ്രിഡ് കഞ്ചാവ് കടത്തുകയും ചെയ്തിരുന്നു. വിമാനത്താവളത്തിന് പുറത്തുവെച്ച് സംഘാംഗങ്ങൾ ലഹരിവസ്തു ഏറ്റുവാങ്ങി സംസ്ഥാനത്തിന്റെ വിവിധ ഭാഗങ്ങളിലേക്ക് വിതരണം ചെയ്യുകയായിരുന്നു ഇവരുടെ പ്രവർത്തനരീതിയെന്ന് പൊലീസ് വ്യക്തമാക്കി.

'ഓപ്പറേഷൻ തൂഫാൻ' എന്ന പ്രത്യേക പരിശോധനയുടെ ഭാഗമായാണ് ഈ കേസിന്റെ അന്വേഷണം ശക്തമാക്കിയത്. ഇതിന് മുമ്പ് 17 കിലോ ഹൈബ്രിഡ് കഞ്ചാവുമായി ഞാറക്കൽ അഴീക്കൽ സ്വദേശിയായ ആയുഷ് (39), ഭാര്യ അനിക (30) എന്നിവരെ പൊലീസ് അറസ്റ്റ് ചെയ്തിരുന്നു.

മാറമ്പിള്ളി കുന്നുവഴി പ്രദേശത്ത് നടത്തിയ വാഹന പരിശോധനയിൽ ബൈക്കിൽ കടത്തുകയായിരുന്ന 1.166 കിലോഗ്രാം ഹൈബ്രിഡ് കഞ്ചാവുമായി ആദ്യം ആയുഷിനെ പിടികൂടി. തുടർന്ന് ഇയാളുടെ കുന്നുവഴിയിലെ ഫ്ലാറ്റിൽ നടത്തിയ പരിശോധനയിൽ 16 കിലോ ഹൈബ്രിഡ് കഞ്ചാവ് കൂടി കണ്ടെത്തി. ഇതോടെയാണ് ഭാര്യ അനികയെയും അറസ്റ്റ് ചെയ്തത്.

ഹൈബ്രിഡ് കഞ്ചാവ് കടത്തിന്റെ സാമ്പത്തിക ഇടപാടുകളും വിദേശ ബന്ധങ്ങളും കേന്ദ്രീകരിച്ച് അന്വേഷണം കൂടുതൽ വ്യാപിപ്പിക്കുമെന്ന് പൊലീസ് അറിയിച്ചു. ലഹരിമരുന്ന് ശൃംഖലയിലെ മറ്റ് പ്രധാന കണ്ണികളെ കണ്ടെത്താനുള്ള ശ്രമവും തുടരുകയാണ്.