ഗംഗയുടെ കുത്തൊഴുക്കിൽപ്പെട്ട തീർഥാടകനെ സാഹസികമായി രക്ഷിച്ച് എസ്.ഡി.ആർ.എഫ് ജവാൻ; വീഡിയോ വൈറൽ

 

ദെഹ്‌റാദൂൺ: ഉത്തരാഖണ്ഡിലെ ഹരിദ്വാറിൽ ഗംഗാനദിയിലെ അതിശക്തമായ ഒഴുക്കിൽപ്പെട്ട തീർഥാടകനെ എസ്.ഡി.ആർ.എഫ് (സ്റ്റേറ്റ് ഡിസാസ്റ്റർ റെസ്‌പോൺസ് ഫോഴ്‌സ്) ജവാൻ സാഹസികമായി രക്ഷപ്പെടുത്തി. ഉത്തർപ്രദേശിലെ നോയിഡ സ്വദേശിയായ ശിവഭക്തൻ പുണ്യസ്നാനത്തിനിടെ ശക്തമായ അടിയൊഴുക്കിൽപ്പെട്ട് ഒഴുകിപ്പോകുകയായിരുന്നു.

സംഭവസമയത്ത് ഡ്യൂട്ടിയിലുണ്ടായിരുന്ന എസ്.ഡി.ആർ.എഫ് ജവാൻ ഒട്ടും മടിക്കാതെ ഗംഗയിലേക്ക് എടുത്തുചാടി. പ്രക്ഷുബ്ധമായ ഒഴുക്കിനെ അതിജീവിച്ച് തീർഥാടകന്റെ സമീപത്തെത്തിയ അദ്ദേഹം സുരക്ഷിതമായി പിടികൂടി കരയിലേക്ക് നീന്തി. ഇതിനിടെ മറ്റ് എസ്.ഡി.ആർ.എഫ് ഉദ്യോഗസ്ഥരും രക്ഷാപ്രവർത്തനത്തിൽ പങ്കുചേർന്നതോടെ ഇരുവരെയും സുരക്ഷിതമായി കരയ്ക്കെത്തിക്കാനായി.

കഠിനമായ പരിശ്രമത്തിനൊടുവിലാണ് മുങ്ങിത്താഴ്ന്നുകൊണ്ടിരുന്ന തീർഥാടകന്റെ ജീവൻ രക്ഷിക്കാനായത്. സംഭവത്തിന്റെ ദൃശ്യങ്ങൾ ഉത്തരാഖണ്ഡ് പോലീസ് ഔദ്യോഗിക എക്സ് അക്കൗണ്ടിലൂടെ പങ്കുവെച്ചതോടെ വീഡിയോ സമൂഹമാധ്യമങ്ങളിൽ വ്യാപകമായി പ്രചരിക്കുകയാണ്.

സ്വന്തം ജീവൻ പോലും പണയപ്പെടുത്തി തീർഥാടകനെ രക്ഷിച്ച എസ്.ഡി.ആർ.എഫ് ജവാന്റെ ധീരതയും കൃത്യസമയത്തുള്ള ഇടപെടലും സാമൂഹിക മാധ്യമങ്ങളിൽ നിരവധി പേരുടെ പ്രശംസ നേടിയിട്ടുണ്ട്.

അതേസമയം, ഹരിദ്വാറിലെ ഘട്ടുകളിൽ മതിയായ ബാരിക്കേഡുകളും മറ്റ് സുരക്ഷാ സംവിധാനങ്ങളും ഇല്ലാത്തതാണ് അപകടസാധ്യത വർധിപ്പിക്കുന്നതെന്ന് ചിലർ ചൂണ്ടിക്കാട്ടി. ഭാവിയിൽ ഇത്തരം അപകടങ്ങൾ ആവർത്തിക്കാതിരിക്കാൻ കൂടുതൽ സുരക്ഷാ മുൻകരുതലുകൾ സ്വീകരിക്കണമെന്ന ആവശ്യവും ഉയരുന്നുണ്ട്.

ഈ സൈറ്റിൽ വരുന്ന കമ്മന്റുകൾക്കു കേരളാ ഹോട്ടൽ ന്യൂസിന് ഉത്തരവാദിത്ത്വം ഉണ്ടായിരിക്കുന്നതല്ല. ഇത് വായനക്കാർ രേഖപ്പെടുത്തുന്ന അവരുടേതായ അഭിപ്രായങ്ങൾ മാത്രമാണ്. 

 

ചാനലിൽ അംഗമാകാൻ താഴെ കൊടുത്തിരിക്കുന്ന ലിങ്കിൽ ക്ലിക്ക് ചെയ്യുക

https://whatsapp.com/channel/0029VaeMpf2JENy6g4eaqV0V 

യൂട്യൂബ് ചാനൽ സബ്സ്ക്രൈബ് ചെയ്യുവാൻ കൊടുത്തിരിക്കുന്ന ലിങ്കിൽ ക്ലിക്ക് ചെയ്യുക

https://www.youtube.com/@khnewsindia

 ഫേസ്ബുക് പേജ് ഫോളോ ചെയ്യുവാൻ താഴെ കൊടുത്തിരിക്കുന്ന ലിങ്കിൽ ക്ലിക്ക് ചെയ്യുക 

https://www.facebook.com/khnewsindia/