കൊച്ചി:കാത്തിരിപ്പിനൊടുവില്‍ കൊച്ചി വാട്ടര്‍ മെട്രോ സര്‍വീസിന് അടുത്തയാഴ്ച തുടക്കം. ഹൈക്കോടതി – വൈപ്പിന്‍ റൂട്ടിലാണ് ആദ്യ സര്‍വീസ്. ഇരുപത് രൂപയാണ് ടിക്കറ്റ് നിരക്ക്.
മിനിമം നിരക്കായ ഇരുപത് രൂപയാണ് ഈ റൂട്ടില്‍ ഈടാക്കുക. തൊട്ടടുത്ത ദിവസങ്ങളില്‍ വൈറ്റില– കാക്കനാട്, ഹൈക്കോടതി– ബോള്‍ഗാട്ടി സര്‍വീസുകളും തുടങ്ങും. പതിനഞ്ച് മിനിറ്റ് ഇടവേളയില്‍ ബോട്ട് സര്‍വീസുണ്ടാകും. ഉദ്ഘാടന തീയതി ഔദ്യോഗികമായി പ്രഖ്യാപിച്ചതോടെ അവസാനവട്ട മിനുക്കുപണികള്‍ പുരോഗമിക്കുകയാണ്. മെട്രോ സര്‍വീസിന് സമാനമായ ടിക്കറ്റ് കൗണ്ടറും അനുബന്ധ സൗകര്യങ്ങളുമാണ് വാട്ടര്‍ മെട്രോയ്ക്കും.
ഏഴ് അത്യാധുനിക ഹൈബ്രിഡ് ബോട്ടുകളാണ് സര്‍വീസിന് തയാറാക്കിയിരിക്കുന്നത്. ഒടുവില്‍ ലഭിച്ച രണ്ട് ബോട്ടുകളുടെ അവസാനവട്ട പരിശോധന പുരോഗമിക്കുകയാണ്. നൂറുപേര്‍ക്ക് സഞ്ചരിക്കാവുന്നതാണ് ഓരോ ബോട്ടും. ഫ്ലോട്ടിങ് പോണ്ടൂണുകളും, അതിവേഗ ചാര്‍ജിങ്ങും, ശീതികരിച്ച ബോട്ടും യാത്രക്കാര്‍ക്ക് നവ്യാനുഭവമാകും. കൊച്ചി കായലിലെ ഒന്‍പത് ദ്വീപുകളടക്കം നഗരവുമായി ബന്ധിപ്പിക്കുകയാണ് പദ്ധതി ലക്ഷ്യം. 1136 കോടിയാണ് ചെലവ്.
