Friday, 19 April 2024

സുഗന്ധഗിരി വനഭൂമി മരംമുറി കേസ്: വനം വകുപ്പിൽ പൊട്ടിത്തെറി

by Web Admin on April 19, 2024

കോഴിക്കോട്: സൗത്ത് വയനാട് ഡി.എഫ്.ഒ. എ.ഷജ്നയുൾപ്പെടെ മൂന്നു പേരെ വയനാട് സുഗന്ധഗിരി മരം മുറിയിൽ സസ്പെൻഡ് ചെയ്തത് രാഷ്ട്രീയ സമ്മർദ്ദത്തെ തുടർന്ന് മരവിപ്പിച്ചതോടെ വനം വകുപ്പിൽ പൊട്ടിത്തെറിയുണ്ടായി. വനം വകുപ്പിലെ ഉന്നത ഉദ്യോഗസ്ഥർ വ്യക്തമാക്കിയത് സുഗന്ധഗിരി കേസിൽ ഇനി കൂടുതൽ ശുപാർശകൾ നൽകാനോ അന്വേഷിക്കാനോ ഇല്ലെന്നും സർക്കാരിന് സ്വന്തം നിലയിൽ നടപടികൾ തീരുമാനിക്കാമെന്നുമാണ്. ഉന്നത ഉദ്യോഗസ്ഥർ ‘മന്ത്രിക്കും മുകളിൽ സൂപ്പർ പവറുകളുള്ള’ ഉദ്യോഗസ്ഥർക്കെതിരെ നടപടിയെടുത്ത് സ്വന്തം തടി കേടാക്കേണ്ടതില്ല എന്ന നിലപാടിലാണ്. അവധിയിൽ പ്രവേശിക്കാനായി ഇതിലൊരാൾ ഒരുങ്ങുന്നതായും സൂചനകളുണ്ട്. ഉദ്യോഗസ്ഥ തലത്തിൽ തന്നെ സുഗന്ധഗിരി മരംമുറിയിൽ കൽപ്പറ്റ റേഞ്ച് ഓഫിസർ കെ.നീതുവിനെ മാത്രം ബലിയാടാക്കിയെന്ന അഭിപ്രായവും ഉണ്ട്.