പുതിയ റെനോ ഡസ്റ്റര്‍ ഇന്ത്യന്‍ വിപണിയില്‍; വില 10.49 ലക്ഷം രൂപ മുതല്‍

ഫ്രഞ്ച് കാര്‍ നിര്‍മാതാക്കളായ റെനോ ഗ്രൂപ്പിന്‍റെ ഉപസ്ഥാപനമായ റെനോ ഇന്ത്യ പുതിയ റെനോ ഡസ്റ്റര്‍ പുറത്തിറക്കി. ടര്‍ബോ പെട്രോള്‍ പതിപ്പിന് 10.49 ലക്ഷം രൂപയിലാണ് എക്സ്-ഷോറൂം വില ആരംഭിക്കുന്നത്. വാഹനങ്ങളുടെ വിതരണം രാജ്യത്തുടനീളം ആരംഭിച്ചു. റെനോ ഗ്രൂപ്പിന്‍റെ അത്യാധുനിക മോഡുലാര്‍ പ്ലാറ്റ്ഫോമില്‍ (ആര്‍ജിഎംപി) നിര്‍മ്മിച്ച പുതിയ റെനോ ഡസ്റ്റര്‍ കരുത്തുറ്റ നിര്‍മ്മാണശൈലിക്കും ഇന്ധനക്ഷമതയ്ക്കും ഭാവിയിലെ സാങ്കേതിക മാറ്റങ്ങള്‍ ഉള്‍ക്കൊള്ളാനുള്ള ശേഷിക്കും മുന്‍ഗണന നല്‍കിയാണ് വികസിപ്പിച്ചിരിക്കുന്നത്.

റെനോയുടെ പുതിയ ആർജിഎംപി പ്ലാറ്റ്‌ഫോമിലാണ് മൂന്നാം തലമുറ ഡസ്റ്റർ നിർമിച്ചിരിക്കുന്നത്. ഹ്യുണ്ടായ് ക്രെറ്റ, കിയ സെൽറ്റോസ്, മാരുതി ഗ്രാൻഡ് വിറ്റാര തുടങ്ങിയ മിഡ്-സൈസ് എസ്‌യുവികളുമായാണ് ഇത് പ്രധാനമായും മത്സരിക്കുന്നത്. 10.49 ലക്ഷം രൂപ മുതൽ 18.49 ലക്ഷം രൂപ വരെയാണ് എക്സ്-ഷോറൂം വില വരുന്നത്.

എൻജിനും പ്രകടനവും

രണ്ട് ടർബോ-പെട്രോൾ എൻജിൻ ഓപ്ഷനുകളിലാണ് പുതിയ ഡസ്റ്റർ വിപണിയിലെത്തുന്നത്. 1.0 ലിറ്റർ ടർബോ-പെട്രോൾ എൻജിനാണ് ആദ്യത്തേത്. ഇത് 100 എച്ച്പി കരുത്തും 160 എൻഎം ടോർക്കും ഉൽപാദിപ്പിക്കുന്നു. 6-സ്പീഡ് മാനുവൽ ഗിയർബോക്സാണ് ഇതിനുള്ളത്. 1.3 ലിറ്റർ ടർബോ-പെട്രോൾ എൻജിൻ ഓപ്ഷനാണ് രണ്ടാമത്തേത്. കൂടുതൽ കരുത്തുള്ള ഈ എൻജിൻ 163 എച്ച്പി പവറും 280 എൻഎം ടോർക്കും നൽകുന്നു. 6-സ്പീഡ് മാനുവൽ അല്ലെങ്കിൽ 6-സ്പീഡ് ഡ്യുവൽ ക്ലച്ച് ഓട്ടോമാറ്റിക് ഗിയർബോക്സ് ലഭ്യമാണ്.

കൂടാതെ, 2026 ദീപാവലിയോടെ ഒരു 1.8 ലിറ്റർ സ്ട്രോങ്-ഹൈബ്രിഡ് പതിപ്പും റെനോ പുറത്തിറക്കും. ഇത് പെട്രോൾ എൻജിനും ഇലക്ട്രിക് മോട്ടോറും സംയോജിപ്പിച്ച് 160 എച്ച്പി കരുത്ത് നൽകുന്ന ഒന്നായിരിക്കും. സൺസെറ്റ് റെഡ്, പേൾ വൈറ്റ്, റിവർ ബ്ലൂ തുടങ്ങി ആറ് നിറങ്ങളിൽ വാഹനം ലഭ്യമാണ്. ടർബോ-പെട്രോൾ വേരിയന്റുകളുടെ ഡെലിവറി ഏപ്രിൽ മുതൽ ആരംഭിക്കും.

പുറംമോടി

ഇന്ത്യൻ വിപണിക്കായി പ്രത്യേകം ചില മാറ്റങ്ങളോടെയാണ് പുതിയ ഡസ്റ്റർ എത്തുന്നത്. എൽഇഡി ഹെഡ്‌ലൈറ്റുകൾ, ഐബ്രോ ആകൃതിയിലുള്ള ഡേ ടൈം റണ്ണിങ് ലാമ്പുകൾ എന്നിവ മുൻവശത്തെ ആകർഷകമാക്കുന്നു. മുൻവശത്തെ ഗ്രില്ലിൽ റെനോ ലോഗോയ്ക്ക് പകരം വലിയ അക്ഷരങ്ങളിൽ 'DUSTER' എന്ന് രേഖപ്പെടുത്തിയിട്ടുണ്ട്. 212 എംഎം ഗ്രൗണ്ട് ക്ലിയറൻസും 18 ഇഞ്ച് ബ്ലാക്ക് അലോയ് വീലുകളും ഇതിന് കരുത്തുറ്റ രൂപം നൽകുന്നു.

അകത്തളവും ഫീച്ചറുകളും

ഡാഷ്‌ബോർഡിൽ വലിയ രണ്ട് സ്ക്രീനുകളാണുള്ളത്. 10.1 ഇഞ്ച് ടച്ച്‌സ്‌ക്രീൻ ഇൻഫോടൈൻമെന്റ് സിസ്റ്റവും 10.25 ഇഞ്ച് ഡിജിറ്റൽ ഇൻസ്ട്രുമെന്റ് ക്ലസ്റ്ററും ഇതിലുണ്ട്. വയർലെസ് ആൻഡ്രോയിഡ് ഓട്ടോ, ആപ്പിൾ കാർപ്ലേ, പനോരമിക് സൺറൂഫ്, വെന്റിലേറ്റഡ് മുൻ സീറ്റുകൾ, ഡ്യുവൽ സോൺ ക്ലൈമറ്റ് കൺട്രോൾ എന്നിവയാണ് മറ്റ് പ്രധാന ഫീച്ചറുകൾ. 518 ലിറ്ററാണ് ഇതിന്റെ ബൂട്ട് സ്പേസ്.

സുരക്ഷ

സുരക്ഷയുടെ കാര്യത്തിലും റെനോ വിട്ടുവീഴ്ച ചെയ്തിട്ടില്ല. ആറ് എയർബാഗുകൾ സ്റ്റാൻഡേർഡായി ലഭിക്കും. നാല് ചക്രങ്ങളിലും ഡിസ്‌ക് ബ്രേക്കുകൾ, 360-ഡിഗ്രി ക്യാമറ, ടയർ പ്രഷർ മോണിറ്ററിംഗ് സിസ്റ്റം എന്നിവയും ഇതിലുണ്ട്. ഇന്ത്യയിൽ ലെവൽ 2 അഡാസ് വാഗ്ദാനം ചെയ്യുന്ന ആദ്യ റെനോ മോഡലാണിത്. 7 വർഷം അല്ലെങ്കിൽ 1.5 ലക്ഷം കിലോമീറ്റർ വാറന്റിയും റെനോ ഉറപ്പുനൽകുന്നു.

ഓതെന്‍റിക്, ഇവല്യൂഷന്‍, ടെക്നോ, ടെക്നോ+, ഐകോണിക് എന്നീ അഞ്ച് വ്യത്യസ്ത ട്രിം വകഭേദങ്ങളില്‍ പുതിയ ഡസ്റ്റര്‍ ലഭ്യമാണ്. വിപണിയില്‍ ടര്‍ബോ ടിസിഇ 160 പതിപ്പിനാണ് നിലവില്‍ ഏറ്റവും കൂടുതല്‍ ആവശ്യക്കാരുള്ളത്. മൊത്തം പെട്രോള്‍ ബുക്കിംഗുകളുടെ 90 ശതമാനവും ഈ കരുത്തുറ്റ മോഡലിനാണ് ലഭിക്കുന്നത്. ആര്‍-പാസ് പ്രീ-ബുക്കിങ് പ്രോഗ്രാമിലൂടെ മാര്‍ച്ച് 31നകം ബുക്ക് ചെയ്യുന്നവര്‍ക്ക് 10.29 ലക്ഷം രൂപ പ്രാരംഭ വിലയില്‍ വാഹനം ലഭിക്കും.