നടി രവീണ ടണ്ടന്റെ മാതാവിന്റെ 25 ലക്ഷം രൂപയുടെ ആഭരണങ്ങൾ കവർന്നു; പരിചാരിക അറസ്റ്റിൽ

നടി രവീണ ടണ്ടന്റെ കുടുംബത്തിന്റെ ഏകദേശം 25 ലക്ഷം രൂപ വിലമതിക്കുന്ന ആഭരണങ്ങളും ആഡംബര വാച്ചുകളും മോഷ്ടിച്ച കേസിൽ 47 കാരിയായ റാഷി ഛബ്രിയയെ മുംബൈയിലെ ജുഹു പോലീസ് അറസ്റ്റ് ചെയ്തു.

2020 മുതൽ പ്രതി ടണ്ടൻ കുടുംബവുമായി അടുപ്പം സൂക്ഷിച്ചിരുന്നു. രവീണ ടണ്ടന്റെ 86 വയസ്സുള്ള അമ്മ വീണ ടണ്ടനെ പരിചരിക്കുന്നതിനായി പതിവായി അവരുടെ വീട്ടിൽ എത്തിയിരുന്നുവെന്നും പോലീസ് പറഞ്ഞു. ഛബ്രിയ കുടുംബവുമായി അടുത്ത ബന്ധം പുലർത്തുന്നയാളാണെന്നും കുടുംബാംഗങ്ങൾക്ക് മാത്രമായി പ്രവേശനം ഉണ്ടായിരുന്ന വീടിന്റെ ചില ഭാഗങ്ങളിൽ ഇവർക്ക് പ്രവേശനം ഉണ്ടായിരുന്നതായും അന്വേഷണ ഉദ്യോഗസ്ഥർ പറഞ്ഞു.

ജുഹുവിലെ കുടുംബത്തിന്റെ വസതിയിൽ സൂക്ഷിച്ചിരുന്ന ലോക്കർ കുത്തിത്തുറന്ന് വീണ ടണ്ടന്റെ സ്വർണ്ണ, വജ്രാഭരണങ്ങളും രവീണയുടെ സഹോദരനും ചലച്ചിത്ര നിർമ്മാതാവുമായ രാജീവ് ടണ്ടന്റെ ഉടമസ്ഥതയിലുള്ള രണ്ട് വിലയേറിയ വാച്ചുകളും മോഷ്ടിച്ചുവെന്ന കുറ്റമാണ് ഇവർക്കെതിരെ ചുമത്തിയിരിക്കുന്നത്.