Delhi Air Pollution: ഡൽഹിയിലെ വായുവിന്റെ ഗുണനിലവാരം ഗുരുതരാവസ്ഥയിൽ തുടരുന്നു
Delhi Air Pollution: രാജ്യതലസ്ഥാനത്ത് വായുവിന്റെ ഗുണനിലവാരം ഗുരുതരാവസ്ഥയിൽ തുടരുന്നു. വെള്ളിയാഴ്ച രാവിലെ ഡൽഹിയിലെ എയർ ക്വാളിറ്റി ഇൻഡക്‌സ് (എക്യുഐ) 360 ആണ് രേഖപ്പെടുത്തിയിരിക്കുന്നത്. വരും ദിവസങ്ങളിൽ സ്ഥിതി മെച്ചപ്പെടാൻ സാധ്യതയില്ലെന്നാണ് ഇന്ത്യൻ കാലാവസ്ഥാ വകുപ്പിലെ (ഐഎംഡി) ഉദ്യോഗസ്ഥർ സൂചിപ്പിക്കുന്നത്. ഡൽഹിയിലെ ശാന്തമായ കാറ്റും താഴ്ന്ന താപനിലയും മലിനീകരണ തോത് വർധിപ്പിക്കുന്നതിന് അനുകൂലമായ അന്തരീക്ഷം സൃഷ്ടിച്ചുവെന്നും അവർ വ്യക്തമാക്കി.
വ്യാഴാഴ്ച വൈകിട്ട് 4 മണിക്ക് ഡൽഹിയിലെ ശരാശരി എക്യുഐ 419 ആയി രേഖപ്പെടുത്തി. ബുധനാഴ്ച 401, ചൊവ്വാഴ്ച 397, തിങ്കളാഴ്ച 358, ഞായറാഴ്ച 218, ശനിയാഴ്ച 220, കഴിഞ്ഞ വെള്ളിയാഴ്ച 279 എന്നിങ്ങനെയാണ് മുമ്പുള്ള ദിവസങ്ങളിലെ കണക്കുകൾ. വ്യാഴാഴ്ച ഡൽഹിയിലുണ്ടായ വായു മലിനീകരണത്തിന് കാരണം വാഹനത്തിൽ നിന്നുള്ള പുറന്തള്ളൽ ആണെന്നാണ് റിപ്പോർട്ട്. ഇത് മൊത്തം മലിനീകരണത്തിന്റെ 25 ശതമാനം വരുമെന്നും ഡൽഹി സർക്കാരും ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്‌നോളജി കാൺപൂരും നൽകിയ കണക്കുകൾ പറയുന്നു.
പരിസ്ഥിതി മന്ത്രി ഗോപാൽ റായിയുടെ നിർദേശപ്രകാരം ഡൽഹി സർക്കാർ വ്യാഴാഴ്ച പ്രത്യേക ദൗത്യസേന രൂപീകരിച്ചു. നിയന്ത്രണങ്ങൾ നടപ്പിലാക്കുക, നിരീക്ഷണ ശ്രമങ്ങൾ സുഗമമാക്കുക, വഷളായിക്കൊണ്ടിരിക്കുന്ന എക്യുഐയെ അഭിസംബോധന ചെയ്യുന്നതിനുള്ള റിപ്പോർട്ടുകൾ സമാഹരിക്കുക എന്നിവയാണ് ഈ ആറംഗ സംഘത്തിന്റെ ചുമതല. ഡൽഹിയിൽ സ്ഥാപിച്ചിട്ടുള്ള പരീക്ഷണാത്മക സ്മോഗ് ടവറുകൾക്ക് നഗരത്തിലെ അന്തരീക്ഷ മലിനീകരണം കുറയ്ക്കാൻ കഴിഞ്ഞിട്ടില്ലെന്ന് ഡൽഹി മലിനീകരണ നിയന്ത്രണ സമിതി (ഡിപിസിസി) ദേശീയ ഹരിത ട്രൈബ്യൂണലിനെ (എൻജിടി) അറിയിച്ചു.
ഡൽഹി സർക്കാർ ഗ്രേഡഡ് റെസ്‌പോൺസ് ആക്ഷൻ പ്ലാൻ (ഗ്രാപ്പ്) സ്റ്റേജ് 4 നടപ്പിലാക്കിയെങ്കിലും ദീപാവലിക്ക് ശേഷം ഡൽഹിയിലെ വായുവിന്റെ ഗുണനിലവാരം മോശമായ അവസ്ഥയിലേക്ക് മാറിയിരുന്നു. കഴിഞ്ഞ ബുധനാഴ്ച തലസ്ഥാനത്ത് ഉണ്ടായ അന്തരീക്ഷ മലിനീകരണത്തിന്റെ 23 ശതമാനത്തിനും കാരണം വൈക്കോൽ കത്തിക്കലാണെന്ന് ഇന്ത്യൻ ഇൻസ്റ്റിറ്റ്യൂട്ട് ഓഫ് ട്രോപ്പിക്കൽ മെറ്റീരിയോളജി പറയുന്നു.
