ശിശുദിന പ്രസംഗം തയ്യാറാക്കേണ്ടത് എങ്ങനെ? എന്തൊക്കെ കാര്യങ്ങൾ ഉൾപ്പെടുത്തണം
ശിശുദിനം എന്നാൽ നെഹ്റുവിന്റെ ജന്മദിനം എന്ന് തന്നെയാണ്. അതുകൊണ്ട് അദ്ദേഹം രാജ്യത്തിന് നല്‍കിയ സംഭാവനകളെ കുറിച്ചുള്ള വിവരങ്ങള്‍ പ്രസംഗത്തിൽ നിർബന്ധമായും വേണം. സ്വാതന്ത്ര്യ സമരവുമായി ബന്ധപ്പെട്ട കാര്യങ്ങളിൽ നെഹ്റുവിന്റെ പോരാട്ടവും, യുവാവായിരുന്ന നെഹ്റുവും വിദ്യാർഥിയായിരുന്ന നെഹ്റുവും എങ്ങനെയായിരുന്നെന്നും പരിശോധിക്കാം.ഇന്ത്യയുടെ പ്രഥമ പ്രധാനമന്ത്രിയാണല്ലോ നെഹ്റു അപ്പോൾ പ്രധാന മന്ത്രിയായിരിക്കെ അദ്ദേഹം ചെയ്ത പ്രവര്‍ത്തനങ്ങളെക്കുറിച്ചും കുട്ടികൾക്കായി ചെയ്ത കാര്യങ്ങളും വിദ്യാഭ്യാസ മേഖലയ്ക്ക് നൽകിയ സംഭവാനകളും പ്രസംഗത്തിൽ ഉള്‍പ്പെടുത്താം. നെഹ്രു, കുട്ടിയായിരുന്നപ്പോള്‍ മകള്‍ ഇന്ദിരാ ഗാന്ധിക്ക് എഴുതിയ കത്തുകൾ ലോക പ്രശസ്തമാണല്ലോ, ഇവ പ്രസംഗത്തിൽ പരാമർശിക്കാവുന്നതാണ്.
നെഹ്രുവിന്‍റെ ജീവിതത്തിൽ കുട്ടികളുമായി ബന്ധപ്പെട്ട് നിൽക്കുന്ന ഏതെങ്കിലും ഒരു സംഭവം എടുത്തുപറഞ്ഞാൽ അത് വിജ്ഞാനപ്രദമായിരിക്കും.ഇന്ത്യയിൽ നവംബർ 14നാണ് ശിശുദിനമെങ്കിലും നവംബർ 20നാണ് അന്തർ ദേശീയ ശിശുദിനം. ഇതിന്‍റെ കാരണം എന്താണെന്ന് പ്രസംഗത്തിന്‍റെ അവസാനഭാഗത്ത് ചൂണ്ടിക്കാണിക്കുന്നത് നന്നാകും. വർത്തമാന കാലത്ത് കുട്ടികൾ നേരിടുന്ന പ്രശ്നങ്ങളും നെഹ്റുവിന്റെ കാഴ്ചപ്പാട് ഇതിൽ എങ്ങനെയായിരുന്നെന്നും, എന്ത് മാറ്റമാണ് സമൂഹത്തിൽ നിങ്ങൾ ആഗ്രഹിക്കുന്നതെന്നുമൊക്കെ ശിശുദിന പ്രസംഗത്തിൽ ഉൾപ്പെടുത്താം.
കുട്ടികള്‍ക്കുള്ള അവകാശങ്ങളേക്കുറിച്ചും അവ സംരക്ഷിക്കേണ്ടതിന്‍റെ ആവശ്യകതയേക്കുറിച്ചും കുട്ടികൾ തന്നെയാണ് സംസാരിക്കേണ്ടത്.കുട്ടികളുടെ ക്ഷേമത്തിലും സ്വാതന്ത്യ്രത്തിലും വിദ്യാഭ്യാസത്തിലും ശ്രദ്ധ കേന്ദ്രീകരിക്കുവാൻ സംഘടിപ്പിക്കുന്ന ദിനാചരണമാണല്ലോ ശിശുദിനം. ഈ ദിവസം മികച്ചതാക്കാൻ നെഹ്റുവിനെയും അദ്ദേഹത്തിന്‍റെ കഥകളും അറിഞ്ഞിരിക്കണം. പ്രസംഗ മത്സരത്തിന് പുറമെ ശിശുദിന ക്വിസ് മത്സരത്തിനും, രചനാമത്സരത്തിനും നെഹ്റുവിന്റെ കഥകൾ നിങ്ങളെ സഹായിക്കും.
